NOTICIAS

Eurorrexión Galicia – Norte de Portugal divulga os proxectos seleccionados para as Residencias Artísticas NORTEAR 2026

O AECT da Eurorrexión Galicia – Norte de Portugal acaba de anunciar os 10 proxectos seleccionados para integrar as Residencias Artísticas NORTEAR 2026, unha iniciativa que ten como obxectivo fomentar a creación artística e reforzar os lazos culturais entre os dous territorios.

As residencias terán lugar do 11 ao 15 de maio, en Tomiño, ofrecendo aos artistas un ambiente de traballo inmersivo e colaborativo. Ao longo desta experiencia, as persoas participantes terán a oportunidade de desenvolver os seus proxectos, ao tempo que promoven o intercambio artístico e cultural entre creadoras e creadores galegos e portugueses.

Os proxectos seleccionados, presentados por autores de ambos lados da fronteira, evidencian a diversidade temática, estética e técnica da creación artística contemporánea na Eurorrexión. Son os seguintes: Torna-viragem; Cartografías; Clube de Escoita; SEPA; Pensei Que Eras Uma Roca!; Quen ousa falar de Idiola Bait?; Máis Aló do Cause; O Simples Mente; Por Linhas Turvas a pedra e a corrente e Peeira.

Durante cinco días, os artistas compartirán un espazo común no que a experimentación, o diálogo e a cocreación asumirán un papel central, promovendo unha abordaxe multidisciplinar e participativa, atenta ás especificidades e potencialidades do territorio.

Ademais do desenvolvemento individual dos proxectos, as Residencias NORTEAR pretenden estimular a creación de redes de colaboración a escala eurorrexional, subliñando o papel da arte como ferramenta de achegamento entre comunidades.

A selección foi realizada por un xurado composto por Isabel Cabaleiro, presidenta do xurado e representante do AECT da Eurorrexión; Cristina Rubal, subdirectora xeral de Bibliotecas e do Libro da Xunta de Galicia; João Ribeiro da Silva, xefe da División de Programación e Promoción Cultural da CCDR NORTE; e André Rodrigues, técnico de xestión de proxectos do AECT, na calidade de secretario.

O xurado destacou a orixinalidade, a relevancia social e artística, así como a diversidade das propostas, reflectindo o dinamismo da creación cultural na Eurorrexión.

As Residencias Artísticas son resultado dunha iniciativa conxunta do AECT da Eurorrexión Galicia – Norte de Portugal, da CCDR NORTE e da Consellería de Cultura, Lingua e Xuventude da Xunta de Galicia. Integradas no proxecto NORTEAR, están cofinanciadas pola Unión Europea a través do programa INTERREG España–Portugal.

Este programa reafirma o compromiso das entidades parceiras co apoio á creación artística, a mobilidade das persoas creadoras e a valorización do territorio transfronteirizo como espazo de innovación, cultura e cooperación.

GALERÍA DE IMÁGENES